Newyddion
08.04.26 Karen Wynne -'Kariad'
Ein gwraig wadd ym mis Ebrill oedd Karen Wynne yr actores a'r consurwraig sy'n perfformio o dan yr enw 'Kariad'. Dywedodd Karen fod dylanwad ei thad yn fawr arni, a thrwy hynny cymerodd ddiddordeb mewn consurio ers yn ifanc iawn. Mae'n gredwr mawr fod siarad, gwenu a dangos y triciau yn help mawr, yn enwedig i bobl fregus ein cymdeithas. Cawsom hanes ei bywyd a'i gyrfa mewn ffordd glyfar iawn trwy gysylltu'r grefft o gonsurio ac adrodd ei hanes.
Cliciwch yma i ddarllen adroddiad o'r noson
11.03.26 Dathlu Gŵyl Dewi
I ddathlu Gŵyl Dewi eleni aeth y gangen draw i gaffi'r Bedol ym Methel ble cafodd pawb eu plesio gyda'r te prynhawn hyfryd ddarparwyd gan y staff. Edrychwyd ar ôl yr aelodau sy'n ddi glwten yn arbennig o dda. Wedi'r gwledda croesawyd Bethan Jones Parry, Is Lywydd Cenedlaethol Merched y Wawr, a chawsom glywed am y gwahanol 'hetiau' fu'n eu gwisgo ar hyd ei gyrfa. Diddorol oedd clywed sut mae'r swyddi yma wedi arwain at, ac a fydd yn bwydo i mewn, ei chyfnod fel Llywydd Merched Y Wawr 2027-2029.
Cliciwch yma i ddarllen adroddiad o'r noson
11.02.26 Cath Parri - Teulu Abram Wood
Yng nghyfarfod mis Chwefror cawsom noson ddifyr gyda Cath Parri a oedd yn son am deulu Abram Wood. Drwy hel achau ac anfon ei DNA i ffwrdd daeth Cath i ddeall ei bod yn perthyn i'r sipsiwn Cymreig a'i bod yn un o ddisgynyddion Abram Wood. Gwelir Cath yn y llun gydag Anita ein Llywydd.
Cliciwch yma i ddarllen adroddiad o'r noson
14.01.26 Elin Tomos - Merched Bröydd y Llechi
Yn ein cyfarfod mis yma daeth Elin Tomos atom i siarad am "Merched Bröydd y Llechi". Roedd yn noson addysgiadol a diddorol dros ben. Yn y llun mae Joyce Gaffey (enillydd y raffl), Elin Tomos, a Gwenan Roberts (Llywydd y noson).
Cliciwch yma i ddarllen adroddiad o'r noson
10.12.25 Cinio Nadolig
Aeth y gangen draw i Becws Melys, Cei Llechi, Caernarfon i ddathlu'r Nadolig eleni ar nos Fercher Rhagfyr 10fed. Roedd y bwyd yn fendigedig, y cwis a'r sgets yn hwyl, a digon o gyfle i ni gael cymdeithasu.
12.11.25 Alwen Derbyshire a Gwenant Pyrs
Cawsom noson hyfryd yng nghwmni dwy dalentog iawn mis yma. Daeth Alwen Derbyshire a Gwenant Pyrs atom i ddweud hanes eu partneriaeth fel athrawon yn cyfansoddi sioeau cerdd, fel awduron Can i Gymru, ac fel aelodau o'r côr llwyddiannus Côr Seiriol. Yn y llun gwelir y ddwy gyda'n Llywydd, Anita Owen.
Cliciwch yma i ddarllen adroddiad o'r noson
07.11.25 Cwis Hwyl Cenedlaethol
Roedd tri thîm o'r gangen yn cystadlu yn y Cwis Hwyl Cenedlaethol ar nos Wener Tachwedd 7fed yn Galeri, Caernarfon. Tîm Caernarfon 1 oedd yn fuddugol yn Rhanbarth Arfon, ac roeddynt hefyd yn 3ydd yn Genedlaethol - Llongyfarchiadau! Diolch yn fawr i gangen Merched Y Wawr Caernarfon am drefnu ac am y baned a’r teisennau hyfryd.
08.10.25 Carys Davies - 'So Chic'
Ein gwraig wadd mis yma oedd Carys Davies o 'So Chic' ym Mangor. Rhoddodd ychydig o’i hanes a sut y cychwynnodd y busnes cyn symud ymlaen at awgrymiadau ar beth i’w wisgo. Pwysleisiodd fod rhaid i rywun deimlo’n gyfforddus yn y dillad, a chael dilledyn o ansawdd da wnaiff bara am flynyddoedd. Gellir ychwanegu belt, mwclis, cadwyni neu sgarff i fynegi steil bersonol. Yn y llun gwelwn ein Llywydd Anita (ar y dde) gyda Carys cyn y cyfarfod.
Cliciwch yma i ddarllen adroddiad o'r noson
10.09.25 Sian Eirian a’i Ffrindiau
Ein hadloniant ar ddechrau ein tymor oedd Sian Eirian a’i ffrindiau, sef ei dau frawd Meurig a Gerallt, a Rona a Iona gyda Mona Meirion yn cyfeilio iddynt. Cafwyd orig fendigedig o unawdau gan Sian, triawd cerdd dant gan Sian, Iona a Rona, pedwarawd ganddynt a gorffen efo'r pump yn canu Eryr Pengwern.
Cliciwch yma i ddarllen adroddiad o'r noson
Archif Newyddion a Lluniau - cliciwch yma
Newyddion
Amdanom
Gwybodaeth
